វាចាអ្នកបោះពុម្ពផ្សាយ
កាសែត ប្រជាជន សោមនស្សរីករាយផ្ញើជូនដល់មិត្តអ្នកអានទាំងអស់នូវចំណងដៃថ្មី " ១៣ ទសវត្សនៃដំណើរកម្ពុជា " ដែលជាស្នាដៃផ្ទាល់របស់សមមិត្តប្រធានក្រុមប្រឹក្សារដ្ឋមន្ត្រី ហ៊ុន សែន កុលបុត្រកម្ពុជាមួយរូប ដែលតែងព្យាយាមស្វែងយល់ពីអ្វីដែលបាននិងកំពុងកើត ហើយនឹងអាចកើតមាននៅលើទឹកដីរបស់ជាតិខ្លួន ។
មិត្តអ្នកអានធ្លាប់ស្គាល់ស្នាដៃនិពន្ធរបស់សមមិត្តប្រធាន ហ៊ុន សែន តាមរយៈសៀវភៅ " ១០ ឆ្នាំ នៃដំណើរកម្ពុជា " តាមរយៈអត្ថបទមួយចំនួន ដែលបានចុះផ្សាយលើទំព័រកាសែតប្រជាជន និងតាមរយៈសំឡេង ព្រមទាំងរូបភាពរបស់សមមិត្ត ដែលផ្សាយដោយវិទ្យុ និងទូរទស្សន៍កម្ពុជា ។
" ១៣ ទសវត្សនៃដំណើរកម្ពុជា " បានប្រសូតចេញដោយការស្រាវជ្រាវសិក្សាហ្មត់ចត់ របស់សមមិត្ត ប្រធាន ហ៊ុន សែន ។ ៧០ ថ្ងៃនៃការនិពន្ធ សមមិត្តប្រធាន ហ៊ុន សែន ត្រូវឆក់យកវិនាទីនីមួយៗ មុនពេលពិសាបាយ ក្នុងពេលសម្រាក ពេលពិសាបារីមួយដើមៗក្ដី ។ ប៉ុន្តែខ្លឹមសារដែលបានលើកឡើងក្នុងសៀវភៅនេះ គឺមានឫសគល់ចាក់ជ្រៅហួសពីរយៈពេល ៧០ ថ្ងៃនោះទៅតទៀត ។ ការសន្សំទុនដូច " តក់ៗពេញបំពង់ " ដែលសមមិត្តប្រធាន ហ៊ុន សែន តែងតែមានទម្លាប់យូរណាស់មកហើយ ការអានសៀវភៅកត់ត្រាទុកជាឯកសារផ្ទាល់ខ្លួន ក៏សមមិត្តប្រធានបានធ្វើជាប្រចាំ ។ តាំងពីពេលដែលសមមិត្តប្រធានបានលះបង់នូវយុវវ័យ របស់សមមិត្ត ដើម្បីតស៊ូ (១៩៧០) រហូតមក ទទួលជារដ្ឋមន្ត្រីការបរទេស និងនាយករដ្ឋមន្ត្រីដ៏ក្មេងបំផុត លើពិភពលោក ក៏ពេលវេលាទាំងនេះមិនបានសង មកឲ្យសមមិត្តវិញ នូវយុវវ័យដ៏ត្រេកត្រអាលរបស់សមមិត្តបានដែរ ។ ពេលវេលានៃយុវវ័យ ត្រូវបានអង្កន់ពុះច្រៀកសម្រាប់ការងារ ការពិចារណា ការអាន ការស្រាវជ្រាវ ការចុះមូលដ្ឋាន ... ហើយទោះបីពេលវេលាបានឈានមកដល់ចុងយុវវ័យរបស់សមមិត្ត នាពេលនោះក៏ដោយ ការសប្បាយរីករាយនៃយុវភាព សមមិត្ត ប្រធាន ហ៊ុន សែន បានត្រឹមតែឈរមើលការសប្បាយរបស់មហាជន ក្នុងពេលសម្រាកនាពេលល្ងាចថ្ងៃសៅរ៍ ឬថ្ងៃអាទិត្យតែប៉ុណ្ណោះ ។ យុវវ័យមួយដែឡបានលះបង់ ដើម្បីយុវវ័យនៃរាប់លានយុវជន យុវនារី នោះហើយដែលជាលក្ខណៈលះបង់មួយដ៏ខ្ពស់ ដែលធ្វើឲ្យសៀវភៅនានារបស់សមមិត្តប្រធាន ហ៊ុន សែន បានចាប់បដិសន្ធិឡើង ហើយមើលឃើញបានអស់ដល់បញ្ហាទាំងឡាយ រាប់ទាំងចំណុចអាថ៌កំបាំងនានា ដែលមានក្នុង ១៣ ទសវត្សកន្លងមកនេះ ។
" ១៣ ទសវត្សនៃដំណើរកម្ពុជា " មានអត្ថប្រយោជន៍សម្រាប់អ្នកស្រាវជ្រាវ អ្នកនិពន្ធ អ្នកវិទ្យាសាស្ត្រនយោបាយ ទស្សនវិទូ ប្រវត្តិវិទូ អ្នកនយោបាយនៃមជ្ឈដ្ឋាននានា ហើយក៏មានអត្ថប្រយោជន៍ដល់សង្គមកម្ពុជាខ្លួនឯង ដល់អ្នកអានក្នុងប្រទេសទៀតផង ដោយម្យ៉ាងការនិពន្ធបានស្រាវជ្រាវ ប្រមូលផ្ដុំពីបញ្ហាទ្រឹស្ដី និងការជាក់ស្ដែងដែល " កម្ពុជា " បានឆ្លងកាត់ ហើយម្យ៉ាងទៀត ក្នុងសង្គមកម្ពុជាយើង ក៏មានការក្រខ្សត់អំពីស្នាដៃនិពន្ធស្រាវជ្រាវ និងសៀវភៅសម្រាប់ការពិចារណា ដ៏មានតម្លៃជាសកលរបៀបនេះដែរ ។
ក្រោយពេលសរសេរចប់ មុននឹងបោះពុម្ពផ្សាយ ក៏មានបណ្ឌិតវិទ្យាសាស្ត្រនយោបាយ និងទស្សនវិទ្យាជាច្រើន បានវាយតម្លៃ និងទទួលស្គាល់ថា ជាវណ្ណកម្មមួយ ដែលមានតម្លៃខ្ពស់ខាងទ្រឹស្ដី និងខាងប្រតិបត្តិជាក់ស្ដែង ដែលមិនត្រឹមតែវិភាគពីអតីតកាល ប៉ុន្តែមានទាំងការវិភាគចំពោះបច្ចុប្បន្ន ក្នុងការពង្រីកវិទ្យាសាស្ត្រនយោបាយទៀតផង ។ ចំពោះ វិធីសាស្ត្រស្រាវជ្រាវ និងវិធីសាស្ត្រលាតត្រដាង " ១៣ ទសវត្សនៃដំណើរកម្ពុជា " បានធ្វើឡើង ដោយមានមូលដ្ឋានពិតប្រាកដ ដើម្បីវាយតម្លៃ មានទឡ្ហីការណ៍ស៊ីជម្រៅ បង្កើតបានលក្ខណៈឡូស៊ីកវិទ្យាសាស្ត្រ ជាការស្រាវជ្រាវមួយឯករាជ្យ ។ ពាក្យពេចន៍ដែលសមមិត្ត ហ៊ុន សែន បានជ្រើសរើសជាពាក្យសាមញ្ញ ដែលងាយយល់សម្រាប់មនុស្សគ្រប់ស្រទាប់ ។
កាសែត ប្រជាជន មានក្ដីជឿជាក់ថា ការបោះពុម្ពនូវសៀវភៅនេះ នឹងផ្ដល់នូវអត្ថប្រយោជន៍ច្រើនបែបយ៉ាង សម្រាប់អ្នកអានគ្រប់ផ្នែកទាំងអស់ ។
ជូនពរ សូមទទួលបានសុខភាពល្អ ក្នុងពេលដែលមិត្តអ្នកអានចាប់កាន់សៀវភៅនេះ ។
0 comments:
Post a Comment