អារម្ភបទ
ប្រទេសកម្ពុជាយើង មានរឿងព្រេងច្រើនជាអនេក មិនអាចគណនាត្រារាប់ចំនួន ថាប៉ុណ្ណោះប៉ុណ្ណេះបាន ។ រឿងទាំងនោះ ចាត់ជាពួកៗ គឺ :
ក. រឿងទាក់ទងដោយប្រវត្តិសាស្ត្រ ដូចរឿង ភ្នំប្រុសភ្នំស្រី នៅខេត្តកំពង់ចាម ភ្នំទ្រុងមាន់ ភ្នំបាណន ភ្នំសំពៅ នៅខេត្តបាត់ដំបង ភ្នំសែនហាន នៅខេត្តកំពត ភ្នំនាងកង្រី នៅខេត្តកំពង់ឆ្នាំង ជាដើម ។
ខ. រឿងទាក់ទងដោយតុលាការកាត់ក្ដី ដូចរឿង សុភាទន្សាយ និង រឿងផ្សេងៗ ដែលមានក្នុងសាស្ត្រាកឹងកន្ត្រៃ ជាដើម ។
គ. រឿងទាក់ទងដោយការនេសាទ របៀបទាក់ ឬបរបាញ់ មានការទាក់ដំរី ជាដើម ។
ឃ. រឿងទាក់ទងដោយទំនៀមទម្លាប់ មានទំនៀមមង្គលការជាដើម ។
រឿងសាស្ត្រាល្បែង ក៏មានច្រើនលើសគណនា ដូចរឿង ព្រះជិនវង្ស ស័ង្ខសិល្បជ័យ ជ័យទត្ត ជាដើម ។
ទាំងរឿងព្រេង ទាំងសាស្ត្រាល្បែង ជារឿងពីរោះពិសា មានសារប្រយោជន៍ខាងផ្លូវវណ្ឌគតិអក្សរសាស្ត្រ ហើយជារឿងសម្រាប់ដឹកនាំអ្នកអាន អ្នកស្ដាប់ ឲ្យកើតសតិបញ្ញា យល់ការខុសត្រូវជ្រៅរាក់ច្រើនមានគំនិតខ្ពស់ ស្គាល់ទោសគុណ រួមយ៉ាងខ្លី គឺឲ្យស្គាល់គតិលោកគតិធម៌ ។
ចំពោះរឿងសាស្ត្រាល្បែង យើងបានសង្កេតដំណើររឿងនីមួយៗ ឃើញបានគតិ ២ យ៉ាង គឺខាងដើមរឿង ច្រើននិយាយពីការកម្សត់ព្រាត់ប្រាស កណ្ដាលរឿង ច្រើននិយាយពីការច្បាំងគ្នា ការប្រណាំងប្រជែងគ្នា ជាគតិលោក ខាងចុងបំផុតរឿង ច្រើនតែនិយាយពីតួឯក ក្នុងរឿងចេញបួសជាតាបសឫសី ដែលជាគតិធម៌ ដើម្បីទាញអារម្ភអ្នកអាន អ្នកស្ដាប់ ឲ្យត្រេកត្រអាលក្នុងកាម តាមផ្លូវលោកជាដើម ឲ្យនឿយលាយចាកកាម តាមផ្លូវធម៌ជាខាងចុង ហើយជាពិសេសបំផុត គឺច្រើនតែជារឿងឃោសនា ដើម្បីទាញទិដ្ឋិអ្នកអាន-ស្ដាប់ ឲ្យជឿកម្មផល តាមគតិពុទ្ធសាសនា ។
ឯរឿងព្រេង និងរឿងសាស្ត្រាល្បែងទាំងប៉ុន្មាន ដែលកើតមាននៅប្រទេសកម្ពុជាយើងនេះ ចែកជា ២ ផ្នែក :
- លោកអ្នកប្រាជ្ញបុរាណ បាននិពន្ធទុក ហើយបច្ឆាជនបានចារដាក់ស្លឹករឹតខ្លះ សរសេរដាក់ក្រាំងខ្លះ ដាក់សៀវភៅខ្លះតៗគ្នា ទុកនៅតាមវត្តអារាម ស្រុកនានា ពេញប្រទេសកម្ពុជាទាំងមូល ។
- ចាស់បុរាណ បាននិទានទុក ហើយបច្ឆាជន បានដំណាលប្រាប់គ្នាតៗមក ដោយមាត់ទទេ ឥតបានចារសរសេរឡើយ ។
បើពុំប្រមូលកត់ត្រាទុកទេ រឿងទាំងនោះ នឹងនៅរាត់រាយ រកកំណត់ចំនួនពុំបាន ហើយនឹងបាត់បង់ ឬ នឹងប្រែក្លាយទៅជារឿងសម័យថ្មី អស់បាត់ពូជដើម ព្រោះហេតុនេះ បានជាក្រុមជំនុំទំនៀមទម្លាប់ខ្មែរ នៅពុទ្ធសាសនបណ្ឌិត្យ បានខិតខំស្រាវជ្រាវរក និងប្រមែប្រមូល ទាំងរឿងដែលចារជាសាស្ត្រា ទាំងរឿងដែលនិទានមាត់ទទេ ដោយវិធីទាក់ទង រវាងសមាជិកឆ្លើយឆ្លងរបស់ក្រុមជំនុំនេះ ដែលមាននៅតាមស្រុកខេត្តនានា និងកត់ត្រាតាមចាស់ៗ ដែលចេះចាំស្ទាត់ មកតម្កល់ទុកក្នុងមន្ទីរក្រុមជំនុំទំនៀមទម្លាប់ និងដោយវិធីចារ សរសេរចម្លង អំពីវត្តអារាមទាំងឡាយ ក្នុងព្រះរាជាណាចក្រ មកតម្កល់ទុកក្នុងបណ្ណាល័យពុទ្ធសាសនបណ្ឌិត្យ ព្រមទាំងដោយវិធីចុះផ្សាយ ក្នុងទស្សនាវដ្ដី កម្ពុជសូរិយា ជាយូរឆ្នាំមកហើយផង ។
ក្រុមជំនុំទំនៀមទម្លាប់ខ្មែរ នៅពុទ្ធសាសនបណ្ឌិត្យ បានស្រង់រឿងព្រេងទាំងប៉ុន្មាន ដែលមានក្នុងមន្ទីរក្រុមជំនុំទំនៀមទម្លាប់ ក្នុងបណ្ណាល័យពុទ្ធសាសនបណ្ឌិត្យ និងក្នុងទស្សនាវដ្ដីកម្ពុជសុរិយា ដែលបានសន្សំទុកជាយូរឆ្នាំហើយនោះ មករួបរួមរៀបចំ បោះពុម្ព ជាសៀវភៅដោយឡែក ចែកជាភាគៗ ឲ្យឈ្មោះថា ប្រជុំរឿងព្រេងខ្មែរ ដើម្បី :
- ឲ្យរឿងព្រេងខ្មែរទាំងប៉ុន្មាន បានមូលត្រកូលគ្នា ស្រួលដល់លោកអ្នកត្រូវការរកទៅអាន ។
- រក្សាស្នាដៃកវីនិពន្ធខ្មែរសម័យបុរាណ ទុកជាកេរ្តិ៍តទៅ កុំឲ្យបាត់បង ។
- ឲ្យយុវជនអ្នកអាន បានឃើញច្បាស់ថា ជាតិខ្មែរយើង មានកេរ្តិ៍មត៌កអក្សរខ្មែរ ច្រើនជាអនេក ។
- ឲ្យយុវជនអ្នកអាន បានស្គាល់ព្រឹត្តិការណ៍អក្សរសាស្ត្រខ្មែរ សម័យបុរាណ ។
- ឲ្យយុវជនអ្នកអាន បានចេះចាំរឿងនិទាន និងពាក្យពេចន៍បុរាណច្រើនបែកប្រាជ្ញា អាចធ្វើការចរចា និង ការនិពន្ធរបស់ខ្លួន ឲ្យមានសម្រសស់ ។
- ឲ្យយុវជនអ្នកនិពន្ធ ងាយប្រៀបធៀបវោហារ ពាក្យពេចន៍សម័យចាស់ និងសម័យថ្មី ហើយធ្វើសេចក្ដីនិពន្ធរបស់ខ្លួនឲ្យមានលម្អ ឲ្យត្រូវគ្រប់សម័យ ។
ចំពោះសៀវភៅប្រជុំរឿងព្រេងខ្មែរ ភាគទី ១ និងភាគទី ២ ខាងចុងបំផុតរឿងនីមួយៗ យើងបានដាក់សុភាសិត តម្រូវតាមគតិដែលមានក្នុងផ្ទៃរឿងនោះៗ សម្រាប់លោកអ្នកអានពិចារណា ។
ឯពាក្យពេចន៍ និងប្រយោគក្នុងរឿងនីមួយៗ យើងទុកឲ្យនៅតាមបុរាណជាច្រើន វៀរលែងតែរឿងណា ដែលកត់ត្រាតាមមាត់ចាស់ៗ និទាន ទើបប្រើរបៀបសម័យថ្មី ។
ចំណែកអក្ខរាវិរុទ្ធ យើងបានកែតម្រូវតាម វចនានុក្រមខ្មែរ សម័យបច្ចុប្បន្ន ។
យើងសង្ឃឹមថា សៀវភៅប្រជុំរឿងព្រេងនេះ នឹងបានជាកម្លាំងមួយ អាចជួយពង្រីកអក្សរសាស្ត្រជាតិ ឲ្យមានវឌ្ឍនាការជាភិយ្យោភាព ។
១ មករា ១៩៥៩
ក្រុមជំនុំទំនៀមទម្លាប់ខ្មែរ
ប្រជុំរឿងព្រេងខ្មែរភាគ ១
- រឿង មនុស្សពីរនាក់នៅផ្ទះជិតគ្នា
- រឿង គង់ហ៊ាន
- រឿង ពាក្យសុភាសិត តម្លៃ ៣០ តម្លឹង
- រឿង មាយាស្រី
- រឿង អាកុហកស៊ី
- រឿង ជាតិខ្លាធំ
- រឿង ចចក
- រឿង ពស់កេងកង
- រឿង បុរសចេះថ្នាំពិសពស់
- រឿង មនុស្សបួននាក់
- រឿង ក្អែកមួយជាក្អែកដប់
- រឿង ចៅសុក្រ និងចៅសៅរ៍
- រឿង គ្រូ និង សិស្ស
- រឿង កំលោះពីរនាក់ ចង់បានប្រពន្ធគេ
- រឿង ចោរចិត្តជា
- រឿង ឪពុកក្មេករើសកូនប្រសា
- រឿង អាសុខស្លូត អាសុខកាច
- រឿង សម្លាញ់ពីរនាក់
- រឿង សួស្ដី និង អពមង្គល
- រឿង ខ្លាចាញ់ប្រាជ្ញាគីង្គក់ និងអណ្ដើក
- រឿង ខ្លា ស្វា និង ទន្សាយ
- រឿង អណ្ដើក និង ស្វា
- រឿង ដង្កូវ និង ក្អែក
- រឿង បងថ្លៃ និង ប្អូនថ្លៃ
- រឿង បុរសកុហក ៤ នាក់
- រឿង បុរសកម្ជិលមានប្រពន្ធគ្រប់លក្ខណ៍
- រឿង បុរសមានកូន ៤ នាក់ រៀនវិជ្ជា ៤ បទ
- រឿង ចៅអាចម៍សេ
- រឿង ស្រីក្ងោកមាស
- រឿង បុរសកាស ៣០
- រឿង បុរសជីកក្ដាម
- រឿង ស្រីមាយាដកខ្ញី
- រឿង តាចន្ទរំលៀក
- រឿង អន្តរាយរឹទ្ធិ នៃសត្វអស្សតរ
0 comments:
Post a Comment